LIBER SEPTIMUS

45-58 Latinus and Lavinia

45 Rēx arva Latīnus et urbēs

46 iam senior longā placidās in pāce regēbat.

47 Hunc Faunō et nymphā genitum Laurente Marīcā

48 accipimus; Faunō Pīcus pater, isque parentem

[T]

49 tē, Sāturne, refert, tū sanguinis ultimus auctor.

50 Fīlius huic fātō dīvum prōlēsque virīlis

51 nūlla fuit, prīmāque oriēns ērepta iuventā est.

52 Sōla domum et tantās servābat fīlia sēdēs

[T]

53 iam mātūra virō, iam plēnīs nūbilis annīs.

54 Multī illam magnō ē Latiō tōtāque petēbant

55 Ausoniā; petit ante aliōs pulcherrimus omnēs

56 Turnus, avīs atavīsque potēns, quem rēgia cōniūnx

57 adiungī generum mīrō properābat amōre;

[T]

58 sed variīs portenta deum terrōribus obstant.

783-792 Turnus Appears

783 Ipse inter prīmōs praestantī corpore Turnus

[T]

784 vertitur arma tenēns et tōtō vertice suprā est.

785 Cui triplicī crīnīta iubā galea alta Chimaeram

786 sustinet Aetnaeōs efflantem faucibus ignēs;

787 tam magis illa fremēns et tristibus effera flammīs

[T]

788 quam magis effūsō crūdēscunt sanguine pugnae.

789 At lēvem clipeum sublātīs cornibus Īō

790 aurō īnsignībat, iam saetīs obsita, iam bōs,

791 argūmentum ingēns, et custōs virginis Argus,

[T]

792 caelātāque amnem fundēns pater Īnachus urnā.

803-817 Camilla Arrives

803 Hōs super advēnit Volscā dē gente Camilla

804 agmen agēns equitum et flōrentēs aere catervās,

805 bellātrīx, nōn illa colō calathīsve Minervae

806 fēmineās adsuēta manūs, sed proelia virgō

[T]

807 dūra patī cursūque pedum praevertere ventōs.

808 Illa vel intāctae segetis per summa volāret

809 grāmina nec tenerās cursū laesisset aristās,

810 vel mare per medium flūctū suspēnsa tumentī

[T]

811 ferret iter celerēs nec tingeret aequore plantās.

812 Illam omnis tēctīs agrīsque effūsa iuventūs

813 turbaque mīrātur mātrum et prōspectat euntem,

814 attonitīs inhiāns animīs ut rēgius ostrō

815 vēlet honōs lēvēs umerōs, ut fībula crīnem

816 aurō internectat, Lyciam ut gerat ipsa pharetram

[T]

817 et pāstōrālem praefīxā cuspide myrtum.